martes, 15 de maio de 2018

Celebramos o Día das Letras Galegas "Contando en feminino" no Concello de Vedra

A AC San Campio organiza, coa colaboración co Concello de Vedra, o IV Concurso Serán das letras para celebrar o Día das Letras Galegas. Con tal motivo este venres terá lugar a entrega de premios dos debuxos, relatos e poemas premiados. Aí estará Ana Hermida para contar historias e ir concienciando ao público na igualdade e violencia de xénero, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.
Será o venres 18 de maio, no local do Ferrador en San Miguel de Sarandón no Concello de Vedra, ás 20:30 h.

xoves, 10 de maio de 2018

“Contadas na súa voz”, celebramos o Día das Letras Galegas con María Victoria Moreno na Biblioteca Ánxel Casal de Compostela

Seguimos rendendo homenaxe á nosa cultura na primavera das letras, nesta ocasión será a María Victoria Moreno, pioneira da literatura galega infantil, a quen a Real Academia Galega dedica este ano o Día das Letras Galegas. Repasaremos a súa biografía e faremos contadas na súa voz para a infancia.

Será o sábado 12 de maio, no salón de actos da Biblioteca Pública de Santiago de Compostela, ás 12:00 h.

luns, 16 de abril de 2018

Celebramos coa Biblioteca de Arteixo o Día do Libro, saíndo á rúa

A Rede de Bibliotecas de Arteixo celebra o Día do Libro e do Dereito de Autora saíndo á rúa e agasallando ás persoas que por alí se acheguen con libros para todas as idades, con tal motivo o persoal das bibliotecas estará a pé de rúa. No Concello de Arteixo hai cinco bibliotecas, a Central en Arteixo "Henrique Rabuñal”, a de Oseiro “Dora Vázquez”, a de Froxel “Francisco Vidal”, a de Pastoriza "Miguel Sande" e a de Meicende "Antón Castro", todas levan nomes de xente da escrita nacida en Arteixo ou relacionada con esta vila. Convidamos á cidadanía a que, como todos anos, encha as rúas de cultura. Nós por aí andaremos entre poemas, contos, igualdade, historias…

O 23 de abril de 1616, dous xigantes da literatura mundial morreron, dous precursores cuxa obra revolucionaría a forma en que se concibiu e escribiu a ficción: Cervantes e Shakespeare. Esta coincidencia é a razón pola cal o 23 de abril foi elixido como día mundial do libro e do dereito de autor. Cando celebramos libros, celebramos actividades -escribir, ler, traducir, publicar- que axudan ás persoas para elevarse e realizarse a si mesmas; e celebramos, dunha maneira fundamental, as liberdades que as fan posibles. Os libros atópanse na intersección dalgunhas das liberdades humanas máis esenciais, principalmente a liberdade de expresión e a liberdade de publicar. Estas son liberdades fráxiles. Ante moitos desafíos, desde o cuestionamiento do dereito de autor e a diversidade cultural ata as ameazas físicas sobre autoras, xornalistas e editoras en moitos países, estas liberdades tamén se negan, mesmo hoxe, cando as escolas son atacadas, e se destrúen manuscritos e libros.

É o noso deber entón, en todo o mundo, protexer estas liberdades e promover a lectura e a escritura para combater o analfabetismo e a pobreza e fortalecer os cimentos da paz, así como protexer ás profesións e profesionais relacionadas coa publicación. A acción das editoras, merece o debido recoñecemento e protección, posto que o movemento de obras escritas é unha contribución esencial á liberdade de expresión, o debate público e o diálogo.

Xuntémonos para celebrar libros que incorporen a creatividade, permitan que as ideas e o coñecemento se compartan a través das fronteiras e fortalezan o entendemento mutuo e o diálogo. (Audrey Azoulay)

luns, 9 de abril de 2018

“Contadas na súa voz”, María Victoria Moreno no Día do Libro co alumnado de EEI de Vilarrodís

Seguimos rendendo homenaxe á nosa cultura, nesta ocasión será a María Victoria Moreno, pioneira da literatura galega infantil, a quen a Real Academia Galega dedicou este ano o Día das Letras Galegas. Repasaremos a súa biografía e a súa obra. Serán historias contadas na súa voz e coa palabra de Ana Hermida. Actividade organizada pola Rede de Bibliotecas de Arteixo, que cada ano leva ao alumnado dos centros escolares ás diferentes bibliotecas do concello para celebrar o Día do Libro.

Achegaremos a figura e obra de María Victoria Moreno ao alumnado da Escola de Educación Infantil de Villarrodís, de Oseiro, concello de Arteixo, será na Biblioteca Francisco Vidal, o luns 9 de abril en doble sesión, a primeira comezará ás 11:00 h. e a segunda ás 12:00 h.

xoves, 5 de abril de 2018

Estivemos Contando en feminino en Ponteceso

As nenas e nenos do CPI Ponteceso asistiron a unha sesión de “Contando en feminino”, contos para a igualdade e violencia de xénero. Ana Hermida estivo na Biblioteca do Concello de Ponteceso, enclave moi fermoso da Costa da Morte, onde o alumnado foi o protagonista, os seus comentarios, conclusións e preguntas son sempre enriquecedoras, dan alento para seguir neste labor de concienciar desde a máis tenra infancia, polo que seguiremos nesta loita silenciosa na que cremos firmemente.

martes, 3 de abril de 2018

“Contadas na súa voz”, María Victoria Moreno no Día do Libro co alumnado de EI do Ceip de Galán, en Oseiro

Seguimos rendendo homenaxe á nosa cultura, nesta ocasión será a María Victoria Moreno, pioneira da literatura galega infantil, a quen a Real Academia Galega dedicou este ano o Día das Letras Galegas. Repasaremos a súa biografía e a súa obra. Serán historias contadas na súa voz e coa palabra de Ana Hermida. Actividade organizada pola Rede de Bibliotecas de Arteixo, que cada ano leva ao alumnado dos centros escolares ás diferentes bibliotecas do concello para celebrar o Día do Libro.

Achegaremos a figura e obra de María Victoria Moreno ao alumnado de Educación Infantil do Ceip de Galán, será na Biblioteca Dora Vázquez, o mércores 4 de abril en dúas sesións, ás 11:00 h. e ás 12:00 h.

mércores, 21 de marzo de 2018

“Contadas na súa voz”, homenaxe a Helena Villar Janeiro na Biblioteca Ánxel Casal de Compostela

Rematamos o mes de marzo rendendo unha merecida e sentida homenaxe á Helena Villar Janeiro, pioneira da literatura infantil en galego. A súa numerosa obra está traducida a outras linguas, sendo unha figura destacada da cultura galega, tanto pola súa dedicación á literatura como ao ensino. Repasaremos a súa biografía e faremos, para a infancia, contadas na súa voz.

Será o sábado 31 de marzo, no salón de actos da Biblioteca Pública de Santiago de Compostela, ás 12:00 h.

martes, 20 de marzo de 2018

O Concello de Arteixo celebrou o Día de Rosalía co Certame de Poesía que leva o seu nome

O Día de Rosalía tivo lugar en Arteixo unha homenaxe á nai das nosas letras, o acto central foi o Certame de Poesía “Rosalía de Castro”. Este ano, na súa cuarta edición, foi un éxito de participación e de público e estivo organizado, ao igual que en anos anteriores, pola Concellería de Cultura de Arteixo en colaboración coa Rede Municipal de Bibliotecas. Abriu o acto Ana Hermida, encargada de conducir a gala, dando lectura ao Manifesto da Aelg que este ano redactou María Reimóndez, seguidamente deron comezo os recitados dos poemas creados para a ocasión polas nenas e nenos participantes, alí estaban co mellor sorriso e os nervos acompañando o camiño. O respecto do público, os aplausos recibidos… todo foi moi fermoso.

A continuación Ana Hermida fixo unha homenaxe a Rosalía con “Poesía é nome de muller”, os versos de Helena Villar Janeiro -a quen lle debemos que o Día de Rosalía sexa hoxe o que é- de Xohana Torres, de Filomena Dato… enchían o ambiente mentres o xurado deliberaba. Máis tarde a obra de Rosalía foi obxecto dunha lectura colectiva por parte das doce persoas participantes: Aldara, Aroa, Alejandra, Sara, David, Marcelo, Sofía, Claudia, Alba, Guillermo, Aldara e Adrián.
Tiña que gañar alguén, así o dicían as bases, foi David, alumno do Ceip Ponte dos Brozos, que cantou as fermosuras de Arteixo co seu poema “O meu pobo”, houbo ademáis un premio por cada categoría: Alejandra con “As estacións”, David con “O meu pobo” e Alba con “Chega a noite”, dos cursos 4º, 5º e 6º respectivamente. Anque en realidade o premio foi para esas doce persoas que coa súa ilusión e talento nos agasallaron coa súa obra, todas levaron como premio un diploma e un lote de libros envolto nun gran aplauso polo moito que nos fixeron disfrutar. David, o gañador absoluto, levou a maiores unha tablet. O xurado estaba composto por María Luísa, Graciela, Dores e Alfredo, que compoñen o clube de lectura da Biblioteca Central de Arteixo “Henrique Rabuñal” e a entrega de premios correu a cargo de Alfredo Ferreiro, en representación do clube de lectura, José Luis Alonso Torreiro, director da Rede de Bibliotecas de Arteixo, Patricia Galán Gómez, directora do Ceip Ponte dos Brozos e Ana María Bello Vázquez, Concelleira de Cultura.
Quixera agradecer ao público -que enchía a sala- a súa asistencia, ás nenas e nenos que participaron ese día e ao resto que enviaron os seus traballos para o certame -este ano a participación foi altísima-, ao profesorado dos centros educativos do Concello de Arteixo polo seu apoio ao certame incentivando ao alumnado e por asistir ao acto –estiveron con moita atención e orgullo disfrutando dos recitados do seu alumnado-, á Rede de Bibliotecas de Arteixo pola organización deste acto e por último agradecer a presencia e participación da Concelleira de Cultura, foi a única representante -dos catro grupos políticos que teñen representación no Concello- que asistiu a honrar a Rosalía de Castro e a disfrutar do talento infantil que temos en Arteixo.
Agardo a edición do próximo ano, seguro que ao igual que nesta, público e participantes irán medrando, así como tamén o amor á poesía. Eu fago actividades por Galicia adiante en bibliotecas, colexios, teatros… pero cando estou na miña terra é algo moi especial, nacín e vivo en Arteixo, son arteixá e presumo da miña vila natal aló por onde vou. Eu tamén fun alumna do Ceip Ponte dos Brozos como a maioría das persoas que participaron neste certame, gardo bonitas lembranzas da miña etapa escolar, coñezo o seu alumnado –ao igual que ao doutros centros de ensino- cando asiste aos contos que lles levo ás cinco biblioteca deste concello, dentro da programación de fomento á lectura que organiza a Rede de Bibliotecas de Arteixo. Volvo daquela á miña etapa escolar e lembro as clases, os corredores, as amizades… fágoo coa imaxinación, nunca tiven oportunidade de contar nese espazo onde medrei entre libros, non os sigo nos centros escolares, si nas bibliotecas e sei do seu amor polos libros e tamén que van por un camiño axeitado. Parabéns Arteixo, grazas e ata o vindeiro ano.

mércores, 7 de marzo de 2018

Contamos “A historia en Feminino” en Pazos de Borbén no 8M

A sociedade civil desempeñou desde sempre un papel esencial nos retos aos que se enfrontan as mulleres. Debemos apoiar as voces da sociedade civil de mulleres, precesisamos unha nova xeración de feminismo que poña fin á cultura da pobreza, os malos tratos, a explotación… por motivos de xénero.

Ana Hermida viaxará ata a Comarca de Vigo e fará un achegamento ao público das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, escritoras, músicas… todas teñen cabida nesta historia en feminino. O público será o alumnado da Eso do Ceip Curros Enríquez, actividade que organiza a Biblioteca de Pazos de Borbén.

A cita será o venres 9 de marzo ás 13:00 h. no Auditorio do Concello de Pazos de Borbén.

venres, 2 de marzo de 2018

Mulleres no espello en Compostela

Estivemos ofrecendo unha ollada a traves da escrita de varios autores sobre a personalidade da muller: o amor, a vinganza, o erotismo, a paixón… Unha exploración sobre a condición feminina e a súa loita continua por existir dunha maneira digna e independente. Orbitamos ao redor da Muller nun enredo convocado para gozar, compartir e sumar. Organizado por Os Catro Gatos en Compostela.

xoves, 1 de marzo de 2018

O Concello de Pazos de Borbén celebra o Día Internacional da Muller contando “A historia en Feminino”

A Biblioteca de Pazos de Borbén organiza esta actividade onde Ana Hermida fará un achegamento ao mundo infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, escritoras, músicas… todas teñen cabida nesta historia en feminino. O público será o alumnado de primaria do Ceip Curros Enríquez e as persoas usuarias da Asociación Aspavi, dando exemplo dunha total inclusión.
A cita será o venres 9 de marzo ás 11:00 h. no Auditorio do Concello de Pazos de Borbén.

luns, 19 de febreiro de 2018

Tecín soia a miña tea, homenaxe a Rosalía na Biblioteca Ánxel Casal de Compostela

Homenaxe a Rosalía de Castro mediante a dramatización dos seus poemas. Este espectáculo pretende amosar unha Rosalía actual, como os temas que ela trata, tan vixentes hoxe en día. A relación cos homes, a defensa da muller, da súa terra... O desexo e ansias súas polo teatro "eu quería ser actriz e non me deixaron". Unha Rosalía, a veces divertida, outras reivindicativa, dura. Unha muller interpretando a outra muller. Poemas, teatro, e algunha canción para honrar a nai da nosa terra.

Será o venres 23 de febreiro, no salón de actos de Biblioteca Pública de Santiago Ánxel Casal, ás 19:30 h. A entrada e libre e gratuíta ata completar a capacidade da sala. Dirixido a público adulto.

xoves, 15 de febreiro de 2018

IV Concurso de Poesía Homenaxe a Rosalía de Castro, en Arteixo

Este ano celébrase a cuarta edición do concurso de poesía en homenaxe a Rosalía de Castro, está organizado pola Concellería de Cultura do Concello de Arteixo a través da Rede Municipal de Bibliotecas. Será o broche de ouro a unha serie de actividades coas que conmemoran o nacemento da escritora padronesa. Haberá 12 nenas e nenos que recitarán a súa propia obra, de entre 8 e 12 anos, que levarán un agasallo pola súa partipación, outro por cada unha das tres categorías e a persoa gañadora recibirá o premio final. Ana Hermida dará lectura ao Manifesto da Aelg e tamén fará unha homenaxe poética feminina á Rosalía de Castro, mentres delibera o xurado composto polo Clube de Lectura da Biblioteca Central de Arteixo “Henrique Rabuñal”.
A cita con Rosalía e coa poesía será o sábado 24, na Sala de Exposicións do Centro Cívico Cultural de Arteixo, ás 11:00 h. A entrada é libre e gratuíta ata completar aforamento.

mércores, 14 de febreiro de 2018

Homenaxe a Filomena Dato "a poeta das Mariñas" en Bergondo

O Concello de Bergondo organiza unha homenaxe a Filomena Dato, na que colabora a Real Academia Galega, a parroquia de San Vicente de Moruxo, A Asociación Irmáns Suárez Picallo e a Asociación Cultural Lisístrata.
Intervirá o párroco Rubén Aramburu, Francisco Pita, da Asociación Cultural Irmáns Suárez Picallo, Ana Hermida, da Asociación Lisístrata, a poeta e editora Dores Tembrás, o presidente da RAG, Víctor F. Freixanes, e a alcaldesa de Bergondo, Alejandra Pérez Máquez. Alumnado de 2º da ESO do CPI Cruz do Sar lerá poemas da escritora. Rematará o acto co descubrimento dunha escultura na honra de Filomena Dato asinada por Francisco Escuredo e coa interpretación do Himno galego a cargo de José Otero López.
O acto terá lugar o martes 26 de febreiro no camposanto de Moruxo, ás 11:15 h.

martes, 13 de febreiro de 2018

Arteixo achega a figura de Rosalía ao alumnado do Ies Manuel Murguía con "Tecín soia a miña tea"

Rosalía de Castro, na voz de Ana Hermida, estará co alumnado do Ies Manuel Murguía. Faremos un repaso pola súa biografía e pola súa obra, haberá representación teatral, dramatización da súa obra e participación do alumnado, que terá ocasión de poñer voz á nosa Poeta nacional. A actividade está organizada pola Concellería de Cultura a través da Rede de Bibliotecas do Concello de Arteixo para celebrar o Día de Rosalía.

Serán dous días de encontro, 21 e 22 de febreiro, cunha Rosalía loitadora, feminista, comprometida e dona dunha obra de inmensa valía. Dúas sesións diarias na Biblioteca Central de Arteixo “Henrique Rabuñal”, a primeira comezará ás 11:00 h. e a seguinte ás 13:00 h.

luns, 12 de febreiro de 2018

Día de Rosalía en Arteixo

A Concellería de Cultura do Concello de Arteixo a través de Rede Municipal de Bibliotecas, celebra o Día de Rosalía cunha serie de actividades para honrar á nai das nosas letras.

O primeiro dos actos ten como protagonista ao alumnado da Eso do Ies Manuel Murguía que asistirá á representación da obra “Tecín soia a miña tea”, dramatizacións da obra Rosaliana e que correrá a cargo da actriz Ana Hermida. Terá lugar os días 21 e 22 e dará comezo ás 11:00 h. 

O acto central será o “Concurso de poesía Homenaxe a Rosalía de Castro” que este ano xa vai pola cuarta edición. Está dirixido á infancia de entre 8 a 12 anos, que recitarán os seus propios poemas. Cada participante levará un agasallo, haberá ademáis un premio por cada unha das tres categorías e a persoa gañadora recibirá o premio final. Ana Hermida dará lectura ao Manifesto da Aelg e tamén se encargará de facer unha homenaxe poética feminina á Rosalía de Castro mentres delibera o xurado composto polo Clube de Lectura da Biblioteca Central de Arteixo “Henrique Rabuñal”.

Convidamos á toda a cidadanía de Arteixo a que participe desta gran festa Rosaliana, será na Sala de Exposicións do Centro Cívico Cultural de Arteixo, ás 11:00 h. A entrada é libre e gratuíta ata completar aforamento.

domingo, 11 de febreiro de 2018

Estivemos en Bergondo na homenaxe a Filomena Dato con "Ningún lazo a suxeita"

Para sacar do esquecemento á escritora xurdiu unha iniciativa de Rubén Aramburu, párroco de Bergondo, a Asociación Cultural Irmáns Suárez Picallo e a Asociación Cultural Lisístrata, que teñen previsto organizar diferentes actos, publicacións, etc. para achegar á cidadanía a obra e figura da poeta nacida en Ourense e falecida en Moruxo (Bergondo).

O Concello de Bergondo organizou unha ofrenda floral a Filomena Dato “a poeta das Mariñas”, abriu o acto Rubén Aramburu, que deu paso que a alcaldesa, Alejandra Pérez, a continuación a obra de Filomena Dato "Ningún lazo a suxeita" soaba na voz de Ana Hermida, despois a intervención musical das Gaiteiras de Bergondo, rematando coa ofrenda floral no adro da igrexa de San Vicente de Moruxo, onde están enterrados os seus restos mortais. Tamén estivo presente unha ampla representación da AC Suárez Picallo. 

venres, 9 de febreiro de 2018

Tecín soia a miña tea, homenaxe a Rosalía en Pazos de Borbén

O Concello de Pazos de Borbén celebra o Día de Rosalía coa obra "Tecín soia a miña tea", onde Ana Hermida fará dramatizacións de poemas da nai das nosas letras. Este espectáculo pretende amosar unha Rosalía actual, como os temas que ela trata, tan vixentes hoxe en día. A relación cos homes, a defensa da muller, da súa terra... O desexo e ansias súas polo teatro "eu quería ser actriz e non me deixaron". Unha Rosalía, a veces divertida, outras reivindicativa, dura. Unha muller interpretando a outra muller.

Será o martes 20 de febreiro ás 13:00 h. no Auditorio do Concello. Está organizado pola Biblioteca de Pazos de Borbén e dirixido ao alumnado de 1º a 4ª da Eso do CPI Curros Enríquez e da Asociación Aspavi.

xoves, 8 de febreiro de 2018

“O Voitre e a Pomba”, a palabra para combater a violencia de xénero

O público adolescente reacciona sempre do mesmo xeito ante o que percibe, os comentarios do coloquio posterior tamén son sempre semellantes, é un aliciente enorme que nos anima a seguir por este camiño. Nin xogos, nin risas, precisan algo contundente que o faga reflexionar, pensar e percibir que é algo real, non se trata dun xogo. Os textos son duros, impactantes e moi necesarios, así o cremos, por eso existe O Voitre e a Pomba.

xoves, 25 de xaneiro de 2018

A historia en Feminino e as mulleres na ciencia

Cando contamos a historia en Feminino sempre están presentes as mulleres na ciencia. Levamos anos tentando ofrecer referentes á infancia sen omitir á metade da poboación. Nesta ocasión, na Biblioteca de Barrionovo, falamos da historia de grandes mulleres galegas e por suposto que estivo presente a ciencia na persoa de Begoña Vila Costas, Premio María Josefa Wonenburger Planells 2017. Desexo que prendera nalgunha das nenas presentes a inquedanza por este mundo onde as mulleres son un referente.

 

domingo, 14 de xaneiro de 2018

“Cóntame outra vez ” na Biblioteca Ánxel Casal de Compostela

Por moito que as coñezan acaban sempre repetindo o mesmo “cóntame outra vez”, así que contamos unha e outra vez as historias que lles gustan, as clásicas, esas que segue a gozar o público infantil e as persoas adultas.

É frecuente ver a persoas relacionadas co mundo da cultura asistir ás sesións de contos para infantil. Ese día en concreto estaba entre o público un actor moi coñecido, alí estaba cun respecto inmenso escoitando historias para a infancia, ese día foi público, non actor. Agardou a que rematase a sesión, axudoume a recoller e tivemos unha conversa longa e moi interesante, contoume os seus proxectos… había tempo que non compartía con el conversas e risas. Alegroume moito atoparme co meu amigo na biblioteca co saúdo de rigor… na miña terra danse dous.

luns, 18 de decembro de 2017

A historia en Feminino, as nosas grandes mulleres galegas

Estiven contando na Biblioteca de Barrionovo, en Pastoriza, a historia de grandes mulleres galegas. Non podía faltar Rosalía de Castro e outra gran muller, Helena Villar Janeiro, a valedora da padronesa universal e que tanto fixo pola figura de Rosalía. Mirade que imaxe tan fermosa!

domingo, 17 de decembro de 2017

Roteiro pola Fraga do Barragán en Pazos de Borbén

Hai unhas semanas estiven contando historias na Senda da Fraga do Barragán, no Concello de Pazos de Borbén, un día que quedará fixado para sempre na miña memoria. As sensacións alí vividas non se poden expresar con palabras. Estiven procurando unha foto que describa esa sensación e penso que esta é a axeitada, o que pretende amosar é a grandeza das persoas coas que compartín espazo, a fortaleza e a vontade dunhas e a xenerosidade e entrega doutras, todas me fixeron sentir tan pequena, sendo elas tan grandes, a miña admiración, rendición e unha tenrura infinita queda plasmada nesta instantánea realizada por José Manuel Soto Virulegio. 

Actividade organizada pola Biblioteca Pública Municipal de Pazos de Borbén - BiblioPazos, dirixida ao alumnado da Eso do Cpi Curros Enríquez e da Asociación Aspavi.

luns, 4 de decembro de 2017

“Sabéndote, Rosalía”, na Biblioteca Ánxel Casal de Compostela

Coa inocencia propia da infancia, unha Rosalía aínda nena, irá debullando a súa vida entre versos, cancións e soños. Quen mellor que Rosalía para facelo? Moito se ten escrito da nosa poeta, pero aínda non está todo dito. É este un achegamento ao mundo infantil da Nai das nosas letras, a Rosalía defensora da muller, da súa terra, unha Rosalía reivindicativa, divertida…

A cita cos contos será o sábado 9 de decembro, no salón de actos da Biblioteca Pública de Santiago de Compostela, ás 12:00 h. e a entrada é libre e gratuíta ata completar aforamento.

mércores, 22 de novembro de 2017

Contando en feminino en Mondariz

Viaxaremos ata o Concello de Mondariz, alí Ana Hermida estará contando historias para ir concienciando ao público infantil na igualdade e violencia de xénero, onde o rol feminino sexa, non o tradicional nos contos, senón algo igualitario. Contos tamén onde o final pode cambiar e tamén onde a protagonista non se vexa como algo inferior e sempre coas mesmas identidades. Xogando e contando, apréndese a formar en igualdade.

O domingo 26 a cita coa igualdade será na Biblioteca Pública de Mondariz “Xoán Xosé Pérez Labaca”, ás 17:00 h.

Monólogos teatrais no 25N en Rois, con Miña casiña, meu lar

“Miña casiña, meu lar” amosa a realidade da muller no seu entorno diario, reflicte a crúa situación das mulleres maltratadas, tanto no físico, coma no verbal, sexual, laboral, psíquico… Diferentes situacións, diferentes mulleres e unha soa actriz que dá vida a todas elas. Sempre cun eixo común, a inxusta realidade coa que se atopan, aínda hoxe, as mulleres no seu día a día. Todo esto posto enriba dun escenario para tentar concienciar ao público na igualdade e violencia de xénero e promover o debate sobre o tema. 

A violencia contra mulleres e nenas pódese evitar. Hai moitas maneiras de previr a violencia nun principio e de deter a repetición dos ciclos de violencia. A prevención da violencia debe empezar nunha etapa temperá. O sistema educativo e o persoal docente están en contacto con nenas e nenos e novos e poden transmitir os principios de igualdade, respecto e actitudes non violentas ás xeracións futuras. Debemos alzar a voz contra o acoso e a violencia nas nosas casas, os nosos lugares de traballo, as nosas institucións, as contornas sociais e a través dos nosos medios de comunicación.

Neste amplo esforzo de poñer fin á violencia contra as mulleres e as nenas, entendemos que os homes desempeñan un papel vital para lograr o cambio. Facer fronte ao sexismo, ao predominio masculino e aos privilexios masculinos como a norma da sociedade empeza coa creación de masculinidades positivas. As nais e os pais poden instilar principios de igualdade, dereitos e respecto cando educan aos seus fillos homes; e os homes poden reprochar aos seus compañeiros comportamentos inaceptables aínda que en realidade estes representen unha pequeñísima parte do gran problema do acoso. A esencia do tema de hoxe de “Que ninguén quede atrás” como comunidade mundial, agora podemos poñer fin á violencia contra as mulleres e as nenas, transformar as institucións e unir esforzos para erradicar a discriminación, restaurar os dereitos humanos e a dignidade, e non deixar a ninguén atrás. (Phumzile Mlambo-Ngcuka).

Será o sábado 25 de novembro ás 20:00 h. no auditorio do Concello de Rois.

A historia en Feminino, unha volta por Galicia a través das súas mulleres, na EEI de Barrionovo

Faremos un achegamento ao mundo infantil das moitas e sobresaíntes, así como descoñecidas, mulleres que houbo ao longo da historia. Científicas, guerreiras, inventoras, aventureiras, escritoras, músicas… todas teñen cabida nesta historia en feminino. O alumnado da Escola de Educación Infantil de Barrionovo, está a traballar co proxecto: A volta a Galicia en 284 días, nese proxecto non podían faltar as mulleres, levaremos un feixiño delas, cun apartado específico para as científicas galegas, anque tamén haberá deportistas, escritoras, artistas, heroínas, etc. para que a infancia teña unha visión real e completa da historia da nosa terra.

A cita será o venres 24 ás 10:00 h. na biblioteca da Escola de Educación Infantil de Barrionovo, en Pastoriza, no Concello de Arteixo.

martes, 14 de novembro de 2017

Peche da campaña do 25N en Boqueixón e Vedra con "A historia en Feminino"

Hoxe pechamos a campaña de concienciación na igualdade e violencia de xénero en todas as Escolas do Cra Boqueixón-Vedra “Neira Vilas” (Lestedo, Sarandón, Camporrapado, Sergude, San Fins e San Xián) para achegar unha versión da historia máis real e así poñer en valor a figura feminina. Faime especial ilusión facer esta actividade nunha escola que leva o nome de Neira Vilas, a quen tiven a sorte de coñecer.

Dou fe de que as familias coidan a coeducación e que o profesorado fai o seu traballo con moito mimo, polo que seguro que medrarán en valores. Esta actividade fíxose grazas á iniciativa da Anpa Val do Ulla, sempre concienciada na igualdade, polo que elixín A Historia en Feminino para tentar visibilizar ás mulleres borradas da memoria, coñecer as súas vidas marabillosas, os seus logros, achegar a realidade oculta durante séculos, amosarlles unha visión real da historia e podo asegurar que a resposta foi a que eu esperaba, está a darme moitas satisfaccións ao comprobar a súa reacción. Pretendo darlle o seu lugar ás mulleres que houbo ao longo da historia e que aínda hoxe seguen nun ocultismo inxusto, a infancia queda cos ollos ben abertos e sen pestanexar, é lóxico, son mulleres cunha historia e vida fascinte.

Será o mércores 15 na Escola de San Fins ás 09:30 h. e na Escola de San Xián ás 10:40 h., no Concello de Vedra.

domingo, 12 de novembro de 2017

A Coruña, outono en igualdade “Contando en feminino” polo 25N

Na Biblioteca Castrillón, pertencente ás Bibliotecas Municipais da Coruña, estivemos Contando en feminino para o público infantil e sigo a sorprenderme coa súa reacción tan de verdade. No medio da narración houbo un neno que coa súa voz inocente pediu “permiso, por favor”, entendín que tiña unha necesidade e que o seu corpo miúdo non aceptaba ningunha demora, mentres eu seguín contando e foi daquela cando deu a volta e díxome “por favor, non sigas ata que volva”, ante eso que ía facer eu? obedecín a súa petición e ocupamos o tempo facendo intercambio de opinións sobre personaxes do conto e o significado do mesmo, cando volveu sentou e con toda a educación dirixiuse a min dicindo “podes seguir”, cun sorriso nos ollos ante tamaña inocencia fixen o que me dixo. Canto agradezo vivir días tan bonitos e comprobar como as historias de igualdade e violencia de xénero son obxecto de tanta atención polo público infantil.

O ambiente era de conto, a biblioteca do Castrillón ten distintos recunchos, pequenos castros, onde a infancia atopa un espazo máxico para perderse na lectura e disfrutar de historias marabillosas onde as bibliotecarias de seguro serán as heroínas, guerreiras, fadas, inventoras... 

Contamos "A historia en Feminino" en Boqueixón, na campaña 25N

Mulleres científicas, guerreiras, inventoras, aventureiras, escritoras, músicas… todas teñen cabida nesta historia en Feminino. A través de contos, curiosidades, diversión e xogos, tentamos facer visibles ás mulleres e que a infancia teña unha visión máis real da historia. Organiza esta actividade a Anpa Val do Ulla, coñecedora da importancia da concienciación na igualdade e violencia de xénero. O profesorado do Cra Boqueixón-Vedra ten moita implicación co alumnado, Ana Hermida foi testigo en primeira persoa e sabemos que esas nenas e nenos medrarán en valores.

A cita coa historia en Feminino será o martes 14 na Escola de Camporrapado ás 09:30 h. e na Escola de Sergude ás 10:50 h., no Concello de Boqueixón. 

sábado, 11 de novembro de 2017

A infancia de Arteixo réndelle homenaxe a Rosalía na III edición do Concurso de Recitados que leva o seu nome

É unha enorme satisfacción ver á infancia recitando a Rosalía  e escoitar os seus poemas en distintos acentos nun concello multicultural como é Arteixo, a miña terra. A infancia toma o certame moi en serio, prepárase moito durante o ano para ese día ver recompensado tan grande esforzo. Cada ano é mellor, eu agradézoo moito xa ademáis de fomentar o amor por Rosalía e a súa obra, tamén vai en aumento o amor pola poesía e as nosas autoras, así como tamén se contribúe a fomentar o uso e amor polo noso idioma.

A Rede Municipal de Bibliotecas do Concello de Arteixo organiza o acto e Ana Hermida quen o coordina e conduce desde o seu inicio, hai xa tres anos. Na foto a gañadora deste ano, foi moi bonito vela e escoitala, ao igual que todas as nenas e nenos participantes, díxome que había tres anos que me vira dramatizando a Rosalía e que quixo facer algo semellante, respondinlle que ela facíao infinitamente mellor ca min, estaba coa súa irmá que non puido participar pola pouca idade e que ao remate tamén me recitou a Rosalía. Agardo con moita ilusión a próxima edición, seguro que me sorprenden gratamente.